Герман зохиолч Волфганг Херндорфийн “Чик” хэмээх энэхүү номд Майк, Чик хэмээх хоёр хүүгийн сонирхолтой, хачирхам амьдралын аялалын тухай өгүүлнэ. Өсвөр насны хүүхдүүдийн сэтгэл зүйг маш энгийнээр, үнэн бодитоор өгүүлж, нээн харуулсан уг зохиол 2010 онд “Оны ялгуусан амжилттай ном”-оор шалгарчээ. Өсвөр насны хүүхэд тань юу бодож, юу хүсэж мөрөөддөгийг ойлгож, түүний нүдээр ертөнцийг хараад үзээрэй. Энэ насны хүүхдүүдэд найз нөхдийнхөө дунд яагаад ч юм “мундаг” харагдах гэсэн хүсэл байдаг. Үүнийг л уг романы зохиолч тун нарийн мэдэрч, гайхалтай энгийнээр дүрсэлжээ. Магадгүй та ном унших дургүй өсвөр насны хүүхэдтэй бол энэ зохиолоор дамжуулан номд дурлах гарааг нь эхлүүлж яагаад болохгүй гэж? Дунд сургуулийн сурагчдад тулгамддаг асуудлууд, шохоорхол, нөхөрлөл зэрэг тойрч гарах аргагүй хамгийн чухал бүхэн тусгагдсан болохоор нүдээ олсон сонголт болох нь гарцаагүй. Эрх дураараа байх дуртай, мөрөөдөмтгий, дурламтгай, саваагүй бас гэнэн цайлган залуу насандаа хийсэн үйлдэл бүр нэг бол сайхан дурсамж эсвэл сайн туршлага болж үлддэг. Харин Чик зохиолын гол баатар Чик, Майк хоёр сайхан дурсамжтай үлдсэн болов уу? Сайн туршлага хуримтлуулсан болов уу?